.png)
Այսօր երիկամի համաշխարհային օրն է: Երիկամները «լուռ» օրգաններ են, շատ դեպքերում սկսում են «խոսել» արդեն իսկ երիկամային անբավարարության շրջանում:
«Միքայելյան» համալսարանական հիվանդանոցի Ընդհանուր թերապիայի կլինիկայի նեֆրոլոգ, ԵՊԲՀ ներքին հիվանդությունների (պուլմոնոլոգիա և նեֆրոլոգիա) ամբիոնի դասախոս Աննա Հարությունյանը նշում է, թե երբ է անհրաժեշտ դիմել նեֆրոլոգին.
- Մեզի քանակի, գույնի փոփոխություն։
- Միզարձակության տարատեսակ խանգարումներ (ցավոտ, դժվարացած, հաճախացած), փրփրոտ մեզ։
- Պերիօրբիտալ շրջանի, ստորին վերջույթների այտուցներ։
- Ցավ և ծանրության զգացողություն գոտկային շրջանում։
- Երիկամային հիվանդությունների ընտանեկան անամնեզ։
- Զարկերակային գերճնշում։
- Շաքարային դիաբետ։
- Պարբերական հիվանդություն, աուտոիմուն հիվանդություններ և այլն։
Նշված բոլոր դեպքերում նեֆրոլոգի խորհրդատվությունը կարևոր է ինչպես հիվանդությունների վաղ հայտնաբերման և բուժման, այնպես էլ կանխարգելման նպատակով:
Աննա Հարությունյանի խոսքով՝ երիկամների քրոնիկ հիվանդության հաճախ հանդիպող պատճառներից է շաքարային դիաբետը (երիկամների դիաբետիկ հիվանդություն): Բժիշկը նշում է, որ շատ կարևոր է կանոնավոր օգտագործել հիպոգլիկեմիկ դեղեր, պահպանել սննդակարգը, տարեկան գոնե մեկ անգամ կատարել երիկամների ՈւՁՀ, արյան բիոքիմիական քննություն, մեզի ընդհանուր քննություն, վաղ հայտնաբերել միկրոալբումինուրիան և սկսել նեֆրոպրոտեկտիվ բուժում՝ հնարավորինս դանդաղեցնելով երիկամային անբավարարության զարգացումը:
